|
بالاجا قارا بالیق
چیلله آخشامی ایدی. قوجا بالیق دریانین دیبینده نوه-نتیجهلرینی اطرافینا توپلاییب اونلارا ناغیل دانیشیردی: - بیری وار ایدی, بیری یوخ ایدی, بیر بالاجا قارا بالیق وار ایدی. او آناسی ایله بیرلیکده کیچیک بیر آرخدا یاشاییردی. آرخین سویو درهیه آخیردی. بالاجا قارا بالیقلا آناسینین بیر قارا داشین دالیندا, یوسونلارین آراسیندا ائولری وار ایدی. آنا و بالا سحردن آخشاما قدر بیر-بیرینین دالینا دوشوب اوزور, هردن باشقا بالیقلارا قوشولوب سرعتله بالاجا بیر یئرده گزیشیر و گئری قاییدیردیلار. قارا بالیق آناسینین بیرجسی ایدی. بیر نئچه گون ایدی کی, او, فیکره دالیر, آز دانیشیردی. کؤنولسوز و تنبل-تنبل او طرف-بو-طرفه گئدیر, گئری قاییدیردی. چوخ واخت آناسیندان خئیلی گئری قالیردی. آناسی اولجه ائله بیلیردی کی, سادجه اولاراق بالاسینین کئفی یوخدور, بو کئفسیزلیک تئزلیکله کئچیب گئدهجکدیر. لاکین… دئمه, بالاجا بالیغین دردی واریمیش… بیر گون سحر تئزدن, گونش دوغمامیش, بالاجا بالیق آناسینی یوخودان اویادیب: -آناجان, -دئدی, سنه بیر نئچه کلمه سؤزوم وار. -ائه, سن ده واخت تاپدین! دانیشماغی سونرایا ساخلا. یاخشی اولار کی, گزمهیه چیخاق, -دئیه آنا بالیق گؤزلرینی اوووشدوردو و اسندی. -یوخ, آناجان, من داها بئله گزمهیی ایستمیرم. گرک بوردان گئدم, -دئیه بالاجا بالیق اعتراض ائتدی. آناسی حیرتله اونا باخیب سوروشدو: -دوغوردان گئتمک ایستییرسن? -بلی, آناجان, حؤکمن گئتمهلییم! -آخی, آلاقارانلیقدا هارا گئتمک ایستییرسن? -ایستییرم, گئدیم گؤروم, آرخ هارادا قورتاریر. بیلیرسنمی, آناجان, اوزون مدتدیر کی, فیکیرلهشیرم, گؤرهسن آرخ هارادا قورتاریر? اما ایندییه قدر بیر نتیجهیه گله بیلمهمیشم. دونن گئجدن گؤزومو یومماییب هر شئیی گؤتور- قوی ائتمیشم. بئله قراره گلمیشم کی, اوزوم گئدیب آرخین قورتاراجاغینی تاپیم. بیلمک ایستییرم باشقا یئرلرده نه وار, نه یوخ… -من ده اوشاق اولاندا بئله فیکیرلره دوشموشم, بالاجان! آرخین نه اولی وار, نه آخیری. ائله گؤردویون نه وارسا اودور. آرخ همیشه آخیر و قورتارمیر. -یوخ, آناجان, بئله دئییل. هر شئیین آخیری وار. مثلا, گئجه سونا چاتیر, هفته, آی, ایل… مگر بونلارین سونو اولمور? بالاجا قارا بالیغین قیزیشدیغینی و دیل آغیزا قویماییب دانیشدیقینی گؤرن آنا بالیق دئدی: -بوش-بوش سؤزلری بیر کنارا قوی, دور گزمهیه چیخاق. ایندی دانیشماق یوخ , گزیب دولانماق واختیدیر. -یوخ, آنا, من بئله گزینتیلهردن یورولموشام. بوردان اوزاقلاشماق و باشقا یئرلرده نلر اولدوغونو بیلمک ایستییرم. بیردن ائله بیلهرسن کی, بونلاری منه کیمسه اویردیب, یوخ, آنا, چوخدان بو فیکره دوشموشم. البته, اوندان-بوندان چوخ شئیلر اویرنمیشم. مثلا, بونو باشا دوشموشم کی, بالیقلارین چوخو حیاتلارینی بوش-بوشونا کئچیردیکلریندن گیلئیلهنیرلر. دایم آه-ناله ائدیر, هر شئیدن شیکایهتلهنیرلر. بیلمک ایستییرم گؤروم حیات ائله بیر قاریش یئرده او یان-بو یانا گئدیب قاییتماقدانمی, قوجالیب هئچ نه گؤرمهمکدنمی عبارتدیر, یوخسا باشقا دونیا دا مؤوجوددور? - بالاجا, دلی اولوبسان? دونیا! دونیا! او باشقا دونیا نه دئمکدیر? دونیا ائله همین دونیادیر کی, بیز یاشییریق, حیات دا کی, ائله گؤردویون یاشاییشدان عبارتدیر! بو زامان ایری بیر بالیق اونلارین ائوینه یاخینلاشدی: - قونشو, -دئدی,-اوشاقلا نیین اوستونده بئله هؤجتلهشیرسن? دئیهسن, بو گون گزمک فیکرینیز یوخدور? آنا بالیق قونشونون سسینی ائشیدیب جاواب وئردی: -گؤر, زمانه نئجه دییشیب?! اوشاقلار اوز آنالارینا جیب-جیب اویرتمهیه باشلاییبلار. -نئجه مگر? -دئیه قونشو ایری بالیق سوروشدو. -گؤر بو جیرتدان هارالارا گئتمک ایستییر?! هئی دئییر کی, ایستییرم گئدیم گؤروم دونیادا نلر اولور? نه بیلیم, آخماق-آخماق سؤزلر! قونشو ایری بالیق: -بالاجا,-دئدی,-دئ گؤروم سن نه واختدان بئله فیلوسوف و عالیم اولوبسان کی, بیزیم خبریمیز یوخدور? بالاجا بالیق دئدی: -خانیم, من بیلمیرم سیز عالیم, فیلوسوف نیه دئییرسینیز? هر گون تکرار اولونان جانسیخیجی گزینتیلهردن جانا دویموشام. بئله یوروجو حیاتی داها داوام ائتدیرمک ایستمیرم. ایستمیرم کی, بیر ده گؤزومو آچاندا گؤروم سیزین کیمی قوجالمیشام, اوزو ده گؤز قولاقلاری باغلی بالیقلار کیمی قالمیشام. قونشو بالیق: -وای,-دئدی,-گؤر بو نلر دانیشیر ?! آنا بالیق دیللهندی : -هئچ دوشونمهزدیم کی, بیر دنه اوشاغیم اولا, او دا بئله چیخا! بیلمیرم, بالامین قولاغینی کیم دولدوروب… بالاجا بالیق دئدی: -هئچ کس منیم قولاغیمی دولدورماییب. آنلاماق اوچون منیم اوزومون آغلیم, گؤرمک اوچون ده گؤزوم وار! قونشو بالیق بالاجا بالیغین آناسینا دئدی: - باجی, او پیچ-پیچ دانیشان ایلبیز یادیندادیرمی?-یاخشی یادیما سالدین, یادیمدادیر! تئز-تئز اوشاغیمین یانینا گلردی. گؤروم اونو گورباگور اولسون! بالاجا بالیق دئدی: -بسدیر, آنا! او, منیم دوستوم ایدی! -بالیقلا ایلبیزین دوستلوغونو ائشیتمهمیشدیک, بونو دا ائشیتدیک! بالاجا بالیق : - من ده بالیقلارلا ایلبیزین دوشمهنچیلییینی ائشیدمهمیشدیم! اما سیز او بیچارهنین باشینی یئدینیز!-دئدی. قونشو دیللهندی: - بو, کئچمیشین صحبتیدیر. - کئچمیشی سیز اوزونوز یادا سالدینیز! آناسی دئدی: - ائله اولمهلی ایدی! مگر اوتوروب-دوروب نلر دانیشدیقلاری یادیندان چیخیب?! - اوندا منی ده اولدورون! چونکی من ده اونون دئدیکلرینی دئییرم,-دئیه بالاجا بالیق گیلئیلهندی. آخیر کی, نه باشینیزی آغریدیم, سس-کویون سداسی باشقا بالیقلاری دا اورایا چکیب گتیردی. بالاجا بالیغین سؤزلری هامینی اسبیلهشدیرمیشدی. قوجا بالیقلار بیر-بیر صحبته قاریشیب بالاجا بالیغا آجیقلاندیلار: -ائله دوشونورسن کی, سنه رحم ائدریک?! -بیر قولاقبورماسی بسدیر! بالاجا قارا بالیغین آناسی اونلارا مقاومت گؤستردی: -کنارا چکیلین! اوشاغیما توخونمایین! بو زامان بالیقلاردان بیر باشقاسی بالاجا بالیغین آناسینا دئدی: -خانیم, اوشاغینی لازیمینجا تربییهلهندیرمهدییین اوچون عذاب چکمهلیسن! قونشو بالیق سؤزه باشلادی: -سیزینله قونشو اولدوغوما خجالت چکیرم! باشقا بیر بالیق دیللهندی: -نه قدر کی, بو ملونون ایشی… گؤندرک قوجا ایلبیزین یانینا. بالیقلار بالاجا بالیغی توتماق ایستدیلر. دوستلاری اونو تهلوکهدن اوزاقلاشدیردیلار. آناسی باش گؤزونه دؤیور, آغلاییر و دئییردی: -الله, سن ساخلا! اوشاغیم علیمدن گئدیر. نه ائدیم? باشیما هارانین داشینی سالیم.? بالاجا بالیق دئدی: -آناجان, منیم اوچون آغلاما, گئریده گالمیش بو قوجا بالیقلارین حالینا آغلا. بالیقلار یئربیئردن چیغیردیلار: -تحقیر ائلمه! -گئت! سونرا پئشمان اولسان, داها بیزدن اینجیمه! -بونلار جاوانلیق علامتیدیر. گئتمه! -بورالارین نیی پیسدیر?! -باشقا دونیا یوخدور! دونیا ائله گؤردویون بو دونیادان عبارتدیر. قاییت! -آغلینی باشینا ییغیب گئتمکدن ایمتینا ائتسن, اوندا بیلهریک کی, دوغوردان دا باشا دوشن بیر بالیقسان! -بیز سنه اویرشمیشیک, گئتمه! آنا بالیق دولوخسوناراق دیللهندی: - منه رحمین گلسین, بالا! گئتمه! بالاجا بالیق اونلارین دئدیکلرینه ائتینا ائتمهدن اوزاقلاشدی. همیاشیدلاریندان بیر نئچسی اونو آرخین گؤلمهچیه تؤکولن یئرینه قدر اوتوروب گئری دؤندولر. بالاجا بالیق دوستلاریندان آیریلارکهن دئدی: -گؤروشنه قدر, دوستلار! منی اونوتمایین! دوستلار: -هئچ اونوداریقمی? سن بیزی قفلت یوخوسوندان اویاتدین. بیزه ائله شئیلر اویرتدین کی, هئچ یوخوموزا دا گیرمهزدی. گؤروشنه قدر, عقللی و جسور دوست!-دئدیلر. بالاجا بالیق شیرریمنان آشاغی سوروشوب آرخا نیسبتن سویو چوخ اولان گؤلمهچیه دوشدو. اولجه اوزونو ایتیردی. سونرا اوزمهیه و گؤلمهچده دولانماغا باشلادی. بالاجا بالیق بو واختادک بو قدر سویون بیر یئره ییغیشدیقینی گؤرمهمیشدی. سودا مینلرله چؤمچقویروق گزیرشیردی. بالاجا بالیغی گؤرن کیمی اونو مسخرهیه گویدولار: - بیر بونون تحر-تؤورونه باخ! سن نه مخلوقسان?! بالاجا بالیق آنی اولاراق فیکیرلهشیب: -خاهیش ائدیرم, تحقیر ائتمهیین,-دئدی,-منیم آدیم بالاجا بالیقدیر. سیز ده آدینیزی دئیین, تانیش اولاق! چؤمچبالیقلاردان بیری دئدی: -بیز بیر-بیرریمیزی ” چؤمچقویروق ” چاغیریرییق. او بیریلری یئردن دئدیلر: - اصلیمیز, نجابتیمیز وار. -دونیادا بیزدن گؤزلی تاپیلماز! سنین کیمی یؤندمسیز دئییلیک! بالاجا بالیق اونلارا بئله جاواب وئردی: -سیزین بو قدر خودپسند اولدوغونوزو بیلمیردیم. اما نادانلیق اوزوندن بئله دانیشدیغینیز اوچون سیزی باغیشلاییرام. چؤمچقویروقلار سسلهندیلر: -دئمهلی بیز نادانیق? -نادان اولماسایدینیز باشا دوشردینیز کی, هر کس اوچون اوز تحر-تؤورو خوشدور. اللها شوکور, سیزین هئچ آدینیز دا اوزونوزونکو دئییل. چؤمچقویروقلار اول اسبیلهشدیلر. سونرا بالاجا بالیغین حاقلی اولدوغونو گؤروب سؤزلرینی دییشدیلر. -سن اوزونو ناحاق یئره یوروسان,-دئدیلر,-بیز سحردن آخشاما قدر دونیانی گزیریک, اما اوزوموزدن, آتا و آنامیزدان, سایسیز-حسابسیز بالاجا قوردلاردان, بؤجکلردن باشقا هئچ کسی گؤرموروک. بالاجا بالیق سوروشدو: -سیز کی, گؤلمهچدن قیراقا چیخا بیلمیرسینیز, دونیانی گزیب دولانماکدان نئجه دم وورا بیلهرسینیز? چؤمچقویروقلار تججوبلهندیلر: - مگر گؤلمهچدن باشقا دا اوزگه دونیا وار? بس نئج? اوزونوز فیکیرلهشین, گؤرون یاشادیغینیز سو هاردان آخیب و سودان کناردا نلر وار? -سودان قیراقدا دا یئر اولار? بیز ایندییه قدر سودان باشقا هئچ یئری گؤرمهمیشیک. ها, ها, ها! سن دلی اولوبسان, نه دیر?! بالاجا قارا بالیغی دا گولمک توتدو. فیکیرلهشدی کی, چؤمچقویروقلاری باشا سالمادان چیخیب گئتسین . سونرا بئله قراره گلدی کی, اونلارین آنالاری ایله ده بیر-ایکی کلهمه دانیشسین. -آنانیز هارادادیر? بو زامان قورباغانین گور سسی اونو دیکسیندیردی. قورباغا گؤلمهچنین قیراغینداکی, ایری داشین اوستونده اوتورموشدو. سویا باش ووردو, گلیب بالیغین قارشیسیندا دایاندی: -من بورادایام, -دئدی, -قوللوق?! -مؤحترم خانیم, سلام! -ائی اصل-نجابتسیز ووجود! نه اللاملیک ائدیرسن? بونلاری اوشاق گؤروب آخماق-آخماق دانیشیرسان? بیر بئله عومور ائلمیشم, گؤرموشم کی, دونیا ائله بو گؤلمهچدن عبارتدیر. یاخشی اولار کی, ایشینین دالیسینجا گئدهسن, منیم اوشاقلاریمی یولدان چیخارمایاسان. -یوز ایل ده عومور ائلسن, یئنه گئری قالمیش, نادان قورباغا کیمی قالاجاقسان! قورباغا حیرصلندی و بالاجا قارا بالیغین اوستونه جومدو. بو زامان گؤلمهچنین دیبی بیر-بیرینه قاریشدی. بالاجا بالیق آلدیغی تکاندان دیغیرلاندی, اوزونو درهدن آخان ائنلی آرخدا گؤردو. دره ایری-اویرو ایدی. داغین باشیندان باخاندا درهنین سویونو ائنلی, آغ ایپه اوخشاتماق اولاردی. درهنین بیر یئرینده داغدان قوپوب آرخا دوشموش ایری بیر داش سویو ایکی یئره بؤلوردو. ایری بیر کرتنکله ده قارنینی داشا سؤیکمیشدی. گونهشین هرارهتیندن لذظت آلیر, سویون تکینده اوولادیغی قورباغانی یئین ایری, یومورو خرچنگه تاماشا ائدیردی. ائله بو آن اورادان اوزوب کئچمک ایستین بالاجا بالیغین گؤزلری خرچنگه ساتاشدی. او, برک قورخدو و اوزاقدان خرچنگه سلام وئردی. خرچنگ بالاجا بالیغی گؤرونجه: -نه ادبلی بالیقسان, -دئدی, -گل قاباغا. بالاجا, گاباغا گل! بالاجا بالیق: -من دونیانی گزمهیه گئدیرم,-دئیه خرچنگه جاواب وئردی, جانابینیزین یئمینه چئویریلمک ایستمیرم! -نییه بئله بدبینسن, قورخاقسان, بالاجا بالیق? -نه بدبینم, نه ده قورخاق. گؤردوکلریمی دئییرم. - چوخ یاخشی, ایندی دئ گؤروم گؤزلرین نه گؤردو و عقلین نه کسدی کی, سنی اوولایاجاغیمی خیالینا گتیردین? -اوزونو بیلمهمزلییه وورما! -بیلیرم, قورباغانین حرکتلرینه ایشاره ائدیرسن. لاپ اوشاقسانمیش کی, بابا! قورباغالارلا آرام اولمادیغی اوچون اونلاری اوولاییرام. اونلار ائله خیال ائدیرلر کی, دونیانین یئگانه مخلوقلاریدیلار و هامیدان خوشبختدیلر. ایستییرم اونلاری باشا سلام کی, دونیا کیمین الینددیر. سن ایسه قورخما, قاداسی! گل قاباغا. قورخما, گل! خرچنگ بو سؤزلری دئییب یانلارینی باسا-باسا بالاجا بالیغا طرف یئریدی. خرچنگ ائله گولمهلی یئریییردی کی, بالیغی ایختییارسیز اولاراق گولمک توتدو. -آی یازیق,-دئدی,-سن هئچ یئریمهیی ده باجارمیرسان. هاردان بیلیرسن دونیا کیمین الینددیر?! بالاجا بالیق خرچنگدن آرالاندی. بو زامان سویون اوزرینه کؤلگه دوشدو. گؤزلهنیلمز ضربهدن خرچنگ سندلهیه-سندلهیه سویون دیبینه باتدی. خرچنگی بو حالینی گؤرن کرتنکلهنی گولمک ائله توتدو کی, آز قالدی سوروشوب سویا دوشسون. خرچنگ ایسه آرتیق سویون اوزونه چیخا بیلمهدی. بالاجا بالیق گؤردو کی, سویون کناریندا بالاجا بیر چوبان دایانیب اونا و خرچنگه تاماشا ائدیر. قویون-کئچی سوروسو ده سویا یاخینلاشدی. “مه-مه! به-به!” سسلری درهنی باشلارینا گؤتوردو. بالاجا بالیق سورونو سو ایچیب قورتارانا قدر گؤزلهدی. سورو گئدندن سونرا کرتنکلهنی سسلهییب: -کرتنکلهجان,-دئدی,-من آرخین قورتاراجاغینی آختارماغا گئدن بالاجا قارا بالیغام. سن بیلیکلی, ذکالی حیوانسان. بونا گؤره ده سندن بعضی شئیلری سوروشماق ایستییرم. -خطرین هر نه ایستییر, سوروش. -یولدا منی نره بالیقلا, ساققا قوشو ایله, بالیقودان قوشلا چوخ قورخودوبلار. بونلار حاقیندا بیر شئی بیلیرسنسه منه دئ! کرتنکله دئدی: -نره بالیقلار و بالیقودانلار بو طرفلرده تاپیلمازلار. خوسوسیله نره بالیقلار. چونکی اونلار دنیزده یاشاییرلار. اما ساققا قوشونا ائله بو هندورده راست گلمک اولار. مباده آلدانیب کیسهسینین ایچریسینه گیرهرسن. - کیسه نه دیر? -بالاجا بالیق اونون سؤزونو کسیب سوروشدو. -ساققا قوشونون بوغازینین آلتیندا خئیلی سوتوتان کیسه وار. بزن تجروبسیز, خام بالیقلار سودا اوزن قوشون کیسهسینه گیریب بیرباشا قارنینا گئدیرلر. ساققا قوشو توخ اولاندا بالیقلاری کیسهسینده احتیاط ساخلاییر. -دئمهلی, اونون قارنینا گئدندن سونرا خلاص اولماق اوچون چاره یولو یوخدور? -یوخدور. کیسهنی پارچالاماقدان باشقا هئچ بیر یول یوخدور. سنه بیر خنجر وئرهرم. ساققا قوشونون چنگینه دوشنده دئدیییم کیمی ائدرسن. کرتنکله قایاداکی یاریغا سورونوب خنجرله قاییتدی. بالاجا بالیق خنجری آلیب دئدی: -کرتنکله, سن چوخ مئهریبانسان, بیلمیرم سنه نئجه تشککور ائدیم? -جانیم, تشککور نیه لازیمدیر, منیم بئله خنجریم چوخدور, سنین کیمی عقللی بالیقلارا باغیشلاییرام. -مگر مندن قاباق دا بورادان کئچن اولوب? --چوخلاری کئچیب. ایندی اونلار اوزلری اوچون بؤیوک دسته دوزلدیبلر… کرتنکله بونلاری دئییب قولاغینی داشداکی یاریغا دایادی: -دی, ساغ اول,-دئدی,-بالالاریم یوخودان آییلدیغی اوچون گئتمهلییم. کرتنکله یاریغا گیردی. بالاجا بالیق ایسه چارهسیز قالیب یولا دوشدو. هئی اوز-اوزونه سوال وئریردی: “دوغوردانمی آرخ دنیزه تؤکولور? ساققا قوشون گوجو ائله منه چاتسین?! بالیقودان قوشون بیزیمله نه دوشمهنچیلییی وار? ” بالاجا بالیق اوزه-اوزه گئدیر و فیکیرلهشیردی. یولبویو تزه شئیلر گؤرور, اویرنیردی. شلالنین باشی اوسته آخماسیندان هزز آلیر, یئنیدن اوزوردو. کورهیینده گونهشین هرارهتینی حیسس ائدیر و مؤحکملهنیردی. او, سونرا ائله بیر یئره چاتدی کی, بورادا دره ائنلهنیر, سو ایسه کوللوقلارین آراسیندان آخیب گئدیردی. بالاجا بالیق سویون چوخالماسیندان لذظت آلیردی. خئیلی گئدندن سونرا او, چوخلو بالیغا راست گلدی. آناسیندان آیریلاندان بری بالیق گؤرمهمیشدی. بیر نئچه ریزه بالیق اونو دؤوریه آلدی و سوروشدو: -ائله بیل قریبسینیز? -بلی, قریبم. اوزاق یئردن گلیرم. ریزه بالیقلار دئدیلر: - هارا گئتمک فیکریندسن? -آرخین قورتاردیغی یئری تاپماغا گئدیرم. - هانسی آرخین? -بیز بونا آرخ یوخ, چای دئییریک. بالاجا بالیق هئچ نه دئمهدی. ریزه بالیقلاردان بیری دیللهندی: -خبرین وار کی, ساققا قوشو یولو کسیب? -خبریم وار, بیلیرهم… باشقا بیر ریزه بالیق سوروشدو: -اونو دا بیلیرسن کی, ساققا قوشونون نه گئنیش کیسهسی وار? -اونو دا بیلیرم. -بونلاری بیله-بیله یئنه گئتمک فیکریندسن? -بلی, بوتون بونلاری بیلیرم و گئتمهلییم. بالیقلار آراسیندا سس یاییلدی کی, اوزاق یوللاردان گلمیش بالاجا قارا بالیق چایین قورتاراجاغینی تاپماق ایستییر و ساققا قوشوندان دا قورخمور. ریزه بالیقلاردان بیر نئچسی بالاجا قارا بالیقلا گئتمک ایستدی, لاکین بؤیوکلرین قورخوسوندان سسلرینی چیخارتمادیلار. حتی اونلارین بیر نئچسی بالاجا قارا بالیغا یاناشیب قیمیلداندی. -ساققا قوشو اولماسایدی, بیز ده سنینله گئدردیک… چایین قیراغیندا بیر کند وار ایدی. کندین قادینلاری و قیزلاری چایین ایچینده قاب-قاجاق و پالتار یویوردولار. بالاجا بالیق اونلارین سس-کویونه بیر خئیلی قولاق آسدی و اوشاقلارین ایسلانمیش بدنلرینه تاماشا ائتدی, سونرا یولا دوزلدی. او قدر گئتدی کی, آخشام اولدو. بالاجا بیر داشین آلتینا گیریب یاتدی. گئجیاری آییلدی و گؤردو کی, آی سویا دوشوب, هر یئری ایشیقلاندیریر. بالاجا بالیق آیی چوخ ایستییردی. گئجلر آی سویا دوشنده یووادان چیخیب اونونلا بیر نئچه کلهمه دانیشماق حسرتیندیدی. اما هر دفعه آناسی آییلیب اونو یوواسینا دارتار و یئنیدن یاتیرداردی. بو دفعه بالاجا بالیق آیین قارشیسینا چیخدی: -سلام, ائی منیم گؤیچک آییم! آی دا بالاجا قارا بالیغی مئهریبانلیقلا قارشیلادی: -حضرت-آغایی ساققا قوشو, بیزیم گوناهیمیز یوخدور, بو بالاجا قارا بالیق بیزی یولدان چیخاردیب… بالاجا قارا بالیق فیکیر و دوشونجلرینی سونا چاتدیرا بیلمهدی. بالیقودان گلدی, اونو گؤتوروب آپاردی. بالاجا بالیق بالیقودانین اوزون دیمدیکلری آراسیندا چاپالاسا دا اوزونو خلاص ائده بیلمهدی. بالیقودان دیمدییی ایله اونون بئلینی ائله برک سیخیردی کی, آز قالا جانی چیخاجاقدی. دیگر طرفدن ده بالاجا قارا بالیق سودان قیراقدا نه قدر ساغ قالا بیلهردی? اولومون قاباغینی آلماق اوچون لاپ بالیقودانین قارنینا گئتمهیه راضی ایدی, آخی, اوراداکی نمیشلیکدن ایستیفاده ائده بیلهردی. بونا گؤره بالیقودانا دئدی: -نه اوجون منی ساغ-ساغ اودمورسان? من او, بالیقلاردانام کی, اولندن سونرا بوتون بدنیم ذحره دؤنر.
برچسبها: سرگرمی
+ نوشته شده در جمعه ۲۸ بهمن ۱۳۹۰ساعت 19:34 توسط سيد مصطفي محمدزاده
|
|
|
